ރައީސް ފާލަމަކީ ރައްޔިތުން ފަގީރު ކަމުގައި ތިއްބާ މޫނު މަތީ ހިންގާލި ބޮޑު އިސްރާފެކެވެ. ރައްޔިތުން ފަގީރު ކަމުގައި ތިއްބާ، ރަސްކަލެއްގެ އިއްޒަތާއި ހައިބަތުގައި، މުއިއްޒު ލަފާ ފުރަން ފާލަމެއް ބޭނުންފުޅުވެގެން، ރައީސް ފާލަމަށް 11 މިލިއަން އިސްރާފުކޮށް، އަދި އެ ހުޅުވުމުގެ ރަސްމިއްޔާތަށް 1 މިލިއަން ރުފިޔާ ޚަރަދުކޮށް ބާއްވައި ވާއިރު، އެމްޑީޕީ ސަރުކާރުން މި ފާލަމާއި މެދު އަމަލު ކުރިކޮށް ރިޕޯޓުގައި ހިމަނާލާނަމެވެ.
އިއްޒުއްދީން ފާލަން މަރާމާތުކުރުމުގެ މަޝްރޫޢަކީ 2021 ވަނަ އަހަރުގެ ފަހުކޮޅުން ފެށިގެން ރޭވިފައިވާ މަޝްރޫޢެއްކަމަށް ވިޔަސް އޭރުގެ ސަރުކާރުން އެ މަޝްރޫޢު މަޑު ޖައްސާލާފައިވަނީ، އެއީ އާންމު ރައްޔިތުންނަށް ފައިދާ ހުރި މަޝްރޫޢަކަށް ނުވާތީއެވެ. އަދި ރައްޔިތުންނަށް ބޭނުންވާ އާސަންދައާއި، އެހެނިހެން ޚިދުމަތަށް އެ ފައިސާ ބެހެއްޓުމުގެ މުހިންމުކަން އޭރު ޤަބޫލު ކުރެވިގެން އެ މަޝްރޫޢު މަޑު ޖައްސާލިއެވެ.
ރައީސް ފާލަމުގެ މަރާމާތުގެ މަސައްކަތުގެ ޓައިމް ލައިނެއް މި ލިޔުމުގައި ތާރީޚަށް ޓަކައި ލިޔެލާނަމެވެ. އެއީ ރައީސް މުއިއްޒު މިކަމަކީ އޭނާގެ ދުރުވިސްނޭ ސިޔާސަތުގެ ތެރެއިން އޭނާ އަމިއްލަ އަށް ހިންގި މަޝްރޫޢެއް ކަމަށް ބުނެ ތަންމިނަށް އާންމު ރައްޔިތުންނަށް އަނެއްކާވެސް ދޮގު ހެދުމާއި ގުޅިގެންނެވެ.
ރައީސް ފާލަން މަރާމާތުކުރުމުގެ ނުވަތަ އަލުން ފަރުމާކުރުމުގެ މަޝްވަރާތައް 2021 ވަނަ އަހަރުގެ ފަހުކޮޅު އޭރުގެ އިންފްރާސްޓްރަކްޗަރ މިނިސްޓްރީ އާއި އެމްޓީސީސީ އާ ދެމެދު ފެށުނެވެ. 2022 ވަނަ އަހަރުގެ މޭ މަހު އެމްޓީސީސީގެ ޑިޒައިން ޓީމުން ފާލަމުގެ ކުރެހުންތައް ފަރުމާކޮށް ޕްރޮޖެކްޓް ޕްރޮޕޯސަލް މިނިސްޓްރީއަށް ހުށަހެޅިއެވެ.
2022 ވަނަ އަހަރުގެ ތެރޭގައި މިނިސްޓްރީގެ އިންޖިނިއަރުންގެ ޓީމުން ކުރެހުންތައް ބަލައި ދެފަރާތުގެ މަޝްވަރާތައް ކުރިއަށް ގެންދެވުނެވެ. ނަމަވެސް އެ އަހަރުގެ ބަޖެޓްގެ ތާށިކަމާއި، މިއަށްވުރެ ބޮޑަށް ރައްޔިތުންނާ ގުޅުންހުރި ތަރައްޤީގެ މަސައްކަތްތައް ހުރުމާއެކު މި ފާލަން ހެދުން އޭރު މަޑުޖައްސާލެވުނެވެ.
2023 ވަނަ އަހަރުގެ މެދުތެރޭގައި މި ފާލަމުގެ ހާލަތު ދަށަށްގޮސް ފާލަން ވެއްޓިދާނެކަމުގެ ބިރު އޮތުމާއެކު، އެމްޓީސީސީ އާއި މިނިސްޓްރީގެ ޓެކްނިކަލް ޓީމާ ދެމެދު މަޝްވަރާތައް ކުރެވި، 2023 ވަނަ އަހަރުގެ އޯގަސްޓް މަހު އެކުންފުންޏާއެކު ޑިޒައިން އެންޑް ބިލްޑް ކޮންޓްރެކްޓެއްގައި ސޮއިކުރެވުނެވެ.
ނަމަވެސް އެ ދުވަސްވަރަކީ ރިޔާސީ އިންތިޚާބުގެ ދުވަސްވަރު ކަމަށްވެފައި، ބަޖެޓްގެވެސް ދަތިކަން ހުރުމާއެކު މަޑުޖައްސާލެވި، އެ ކޮންޓްރެކްޓްގެ ދަށުން ފާލަން ނުވެއްޓޭވަރަށް މަރާމާތުކޮށް ބެލެހެއްޓުމާއި، 2024 ގައި އިތުރަށް ފާލަން ތަރައްޤީކުރުމުގެ މަސައްކަތް ފެށުމަށް އެމްޓީސީސީ އާއެކު އެއްބަސްވެވުނެވެ. ނަމަވެސް އޭރުވެސް އެކަން ނިންމާފައިވަނީ 2024 ގައި ބަޖެޓު ތަންދިން މިންވަރަކުން ރައްޔިތުންނަށް މުހިންމު ކަންކަމަށް އިސްކަން ދިނުމަށްފަހު، އެފަދަ ކަމެއް ކުރުމުގެ ފުރުޞަތު އޮތިއްޔާ ކުޜާ ގޮތަށެވެ.
ފައިސާގެ ދަތިކަން އިންތިހާއަށް އޮއްވާ، މުއިއްޒުގެ ސަރުކާރުން މި ފާލަން ހެދުމުގެ މަސައްކަތް ކުރިއަށް ގެންދިއުމަށް ނިންމައި، 2024 ވަނަ އަހަރުގެ މޭ މަހުގެ ތެރޭގައި ފާލަން ބަންދުކޮށް ބިއްގަނޑު ޖަހައި މަސައްކަތް ފެށިއެވެ.
ރައްޔިތުންނަށް ބޭނުންވާ އަސާސީ ޚިދުމަތްތައް އުނި ކުރުމަށް ފަހު، މުއިއްޒަށް މުހިންމުވީ، އޭނާގެ ހައިބަތު ދެއްކުމަށެވެ. މުއިއްޒަށް މުހިންމުވީ އޭނާގެ ޝަހެންޝާހިއްޔަތާއި، ވެރިކަމުގެ މަތިވެރިވެގެންވާ މޫރިތި ކަމާއި، މުއިއްޒުގެ މަތިވެރިކަމަށް އާގަމަ ވެފައި ފާލަން ކައިރީ މީހުން އޭގެ ހައިބަތަށް އަޖާބުވެ ބަލަން ތިބޭ ތިބުމެވެ.
އެ ރައީސް ފަލާމާއި ޖެހިގެން ކިޔު ޖެހި، އާންމު ރައްޔިތުން މަގުމަތީ ވެހޭހާ ވާރެއެއްގައި، ދޭހާއައްވެއްގައި، ރަށްރަށަށް ފުރާ ފެރީތައް ފުރާ މަންޒަރު ބަލަން ހުރެ، މުއިއްޒު އިއްޒަތާއި، މުއްސަނދިކަން ދެއްކުމަށް ހަމަ ޖެހިގެން ބޮޑު ފާލަމެއް 11 މިލިއަން އިސްރާފުކޮށް މިވަގުތު އެޅި އެޅުމަކީ އަނިޔާވެރިކަން ނޫން އިތުރު ކޮން ކަމެއްތޯއެވެ؟
