އުއްތަމަ ފަޑިޔާރު މުއިއްޒުގެ ފައިބުޑަށް ނުވެއްޓޭނަމަ، އެންމެ ފުރަތަމަ ސަސްޕެންޑު ކުރާނީ އުއްތަމަ ފަނޑިޔާރު ކަމާއި މެދު އެއްވެސް ޝައްކެއް ނެތެވެ. މިކަން ނޭނގޭ ވަރުގެ ސިޔާސީ މީހަކު މިރާއްޖެއަކު މިއަދަކު ނެތެވެ. މި ސަރުކާރުން މުއުތަޒިމް އަދުނާނު ގައިގައި އިނގިލި ކުރިވެސް ޖައްސާ ނުލާނެއެވެ. ނަމަވެސް، ޙަޤީގަތް އޮޅުވާލުމަށް މުއުތަޒިމް އަދުނާނު ދިފާޢުކޮށް ވާހަކަ ދައްކަމުން ދާ ދެތިން މީހުންނަކީ، ކޯޓު ތެރެއިން އޭނާގެ ކިބައިން މަންފާ ހޯދާފައިވާ އަދި ސިޔާސީ މަގުޞަދެއް ހާސިލުކުކުރުމަށް ކަނޑައެޅިގެން ދޮގާއި މަކަރުހަދާ މުއިއްޒުފަދަ ނުބައި ކޮރަޕްޓް އަނިޔާވެރިންނެވެ.
ތިން ފަނޑިޔާރަކު ސަސްޕެންޑު ކޮށް އެމީހުންނާއި މެދު، ވުޖޫދުގައި ނެތް މައްސަލަތަކެއް ބަލަމުން ގެންދަނީ އުއްތަމަ ފަނޑިޔާރު އަޙްމަދު މުޢުތަސިމް ޢަދުނާނު އާއި، ބަންޑާރަ ނައިބު އަހުމަދު އުޝާމް އާއި، މަޖިލީހުގެ ނައިބު ރައީސް ޖަންގިޔާ ނާޒިމުއާއި، ހޯމް މިނިސްޓަރ އިހުސާނުގެ އިތުރުން، ރާއްޖޭގެ ރައީސުލްޖުމްހޫރިއްޔާ މުހައްމަދު މުއިއްޒު އޭގެ އެންމެ އަޑީގައި ހުރެގެންނެވެ.
އުއްތަމަ ފަނޑިޔާރު އިސްވެ ހުންނަވައި، މުޅި ޖުޑިޝިއަރީގެ މިނިވަންކަން މުއިއްޒަށް ވިއްކާލަން ރޯޔަލް އައިލެންޑްގައި ރޭވުންތައް ރާވައި، ރާއްޖޭގެ ތިން ބާރު ވަކި ވެފައި އޮތް ނިޒާމު ފުނޑު ފުނޑު ކޮށްލުމަށް އުއްތަމަ ފަނޑިޔާރު މުޢުތަސިމް ޢަދުނާނު ކުރަމުންދާ މަސައްކަތްތަކަކީ ރާއްޖޭގެ ތާރީޚުގައި އުއްތަމަ ފަނޑިޔާރަކު އަލަން ކުރަމުން އަންނަ މިފަދަ ނުރައްކާތެރި އަނިޔާވެރި މަސައްކަތްތަކެކެވެ.
އުއްތަމަ ފަނޑިޔާރު އަޙްމަދު މުޢުތަސިމް ޢަދުނާނު މުއިއްޒުގެ ފައިބުޑަށް ވެއްޓެން މެދުވެރިވީ ފައިސާގެ އިތުރަށް ކުރިމަތި ވެފައިވާ މަޖުބޫރީ ހާލަތުގެ ސަބަބުންނެވެ. ދެ މައްސަލައެއް ނިންމުމުގައި ނަގާފައިވާ ކޮރަޕްޓް ފައިސާގެ މުއާމަލާތުގެ ތަފްސީލު މުއިއްޒުއަށް އެނގިފައިވުމާއި، އޭނާގެ ފަރާތުން މުއިއްޒު އާއި ހަމައަށް ގޮސްފައިވާ މައްސަލަތަކަކީ ޖުޑިޝަލް ސާރވިސް ކޮމިޝަނުން އެ މައްސަލަތައް ބަލައިފިނަމަ، ވަގުތުން އޭނާގެ މައްޗަށް ސާބިތުވެ، ފިޔަވަޅު އެޅި، ފަނޑިޔާރު ކަމުން އޭނާ ވަކިކުރާނެ ވަރުގެ ބޮޑެތި މައްސަލަތައް ކަމަށް ވުމުން، އޭނާ އަށް އޮތީ މުއިއްޒު ބުނި ވަރަކަށް ކުރުނީސްކޮށް މުއިއްޒު ބުނިކަމެއް ބުނި ގޮތަކަށް ކުރުމެވެ.
ދިޔަވަރު ނޫހުން މި މައްސަލަތައް ވަކި ވަކިން ކުރިއަށް އޮތްތާގައި ގެނެސްދޭނަމަވެ. އިންސާފާއި ހަމަހަމަ ކަން ނަގާލައި، ފަރުދާގެ ފުރަގަހުގައި ތިބެ، ރައްޔިތުންނަށް އަނިޔާދޭން ރާވާ، މުޢުތަސިމް އަދުނާނު ފަދަ އަނިޔާވެރިންގެ އަސްލު ސޫރަ ރައްޔިތުންނާއި ހަމައަށް ގެނެސްދިނުމުގައި އަޅުގަނޑުމެން ދާނީ ކުރިއަށެވެ. ނިތްކުރި މައްޗަށް ވާހެން ސައިޑަކަށް ފުނާ އަޅާއިގެން، މޭމައްޗަށް ބެގީ ނަގައިގެން، އިސްތަށަށް ޖަހައިގެން، އައިނެއް އަޅައިގެން ހުއްޓަކަސް، އަނިޔާވެރިޔަކު ވާނީ ހަމަ އަނިޔާވެރިއަކަށެވެ.
