ފެންޓިނޯލް އުފެއްދުމަށް ބޭނުންކުރެވޭ ދެ ކެމިކަލް ކޮންޓްރޯލް ކުރުމަށް ޗައިނާ ސަރުކާރުން ފިޔަވަޅު އަޅައިފިއެވެ. މިއީ އެމެރިކާއިން ޗައިނާ އަށް ވިޔަފާރީގެ ދަތިތައް ކުރިމަތިކޮށް، އެމެރިކާއިން ގިނަ ޕްރެޝަރތަކެއް ކޮށްގެންނެވެ.
ޓްރަމްޕުގެ ސަރުކާރުން ޗައިނާ ސަރުކާރުގެ މައްޗަށް ތުހުމަތު ކޮށްފައިވަނީ އެމެރިކާއަށް ފެންޓިނޯލް ފޮނުވުން ހުއްޓުވުމަށް އެކަށީގެންވާ ފިޔަވަޅު ޗައިނާއިން ނާޅާ ކަމަށެވެ. މި ޑްރަގުގެ ސަބަބުން އެމެރިކާގައި ކޮންމެ އަހަރަކު ދިހަ ހާހަކަށްވުރެ ގިނަ މީހުން މަރުވެއެވެ. މިއީ ރާއްޖޭގައި ވެސް ވިއްކާ ޑްރަގެއް ކަމަށް މައުލޫމާތު ލިބެއެވެ.
މި ހަފުތާގައި، ޗައިނާއިން ވަނީ “4-ޕިޕެރިޑޯން” އަދި “1-ބޮކް-4-ޕިޕެރިޑޯން” މި ދެ ކެމިކަލް ފެންޓިނޯލް އުފެއްދުމަށް ބޭނުންކުރެވޭ ކެމިކަލްތަކުގެ ލިސްޓަށް އިތުރުކޮށް، މި ދެ ކެމިކަލް އެކްސްޕޯޓް ކުރުމުގެ މަރުހަލާއަށް ޚަރުދަނާ ފިޔަވަޅުތަކެއް ތަޢާރަފްކޮށްފައެވެ.
އެހެންނަމަވެސް، މި ފިޔަވަޅުތައް މިހާތަނަށް ނޭޅި ހުރީ ކީއްވެގެންތޯ އެއީ ސުވާލެކެވެ. މިފަދަ ނުރައްކާތެރި ޑްރަގެއް އުފައްދަން ބޭނުންކުރާ ކެމިކަލް ޗައިނާއިން މިހާ ފަސޭހައިން ބޭރ ކުރުމުގައި ޗައިނާއިން މިހާތަނަށް އެކަށީގެންވާ ފިޔަވަޅުތަކެއް އަޅާފައި ނުވާކަން ފާހަގަކުރެވެއެވެ. ފެންޓިނޯލްގެ ސަބަބުން މުޅި ދުނިޔޭގެ ގިނަ ޤައުމުތަކުގެ ޒުވާނުން މަރުވަމުންދާއިރު، ދިވެހިރާއްޖޭގައިވެސް މި ޑްރަގް ބޭނުންކޮށްގެން މަރުވާ މީހުންގެ ރިޕޯޓްތައް ލިބެމުންދެއެވެ.
އަދި ސޯޝަލް މީޑިޔާގައި ޔޫއެސްގެ އެކި ފަރާތްތަކުން މި ޑްރަގު އުފެއްދުމަށް ޗައިނާއިން އަދާ ކުރާ ދައުރުގެ ސަބަބުން މިއީ އެގައުމުން އެހެން ޤައުމުތަކުގެ ޒުވާނުންނަށް އަމާޒުކޮށްގެން ދޭ ހަމަލާއެއް ގޮތުގައި ސިފަކޮށްފައިވެއެވެ.
މި އައު ހަރުކަށި ގަވާއިދުތައް ޖުލައި 20، 2023 އިން ފެށިގެން ތަންފީޒުކުރެވޭނެކަމަށް ޗައިނާއިން ވަނީ ހާމަކޮށްފައެވެ. މިއީ ފާއިތުވި ހަފުތާގައި ޗައިނާގެ މިނިސްޓަރ އޮފް ޕަބްލިކް ސެކިއުރިޓީ، ވަންގް ޝިއައޮހޮންގް، އާއި އެމެރިކާއިން ޗައިނާއަށް އައްޔަންކޮށްފައިވާ އެމްބެސެޑަރ ޑޭވިޑް ޕަރޑިއު ބައްދަލުކޮށް ޑްރަގް ޓްރެފިކިންގް ހުއްޓުވުމާގުޅޭ މަޝްވަރާކުރުމަށްފަހު އެޅުނު ފިޔަވަޅެކެވެ.
