އިއުލާން ނުކޮށް މުއިއްޒު ޕްރޮޖެކްޓް ހަވާލުކުރި 200 ކުންފުނުންޏަށް، އެއްބަސްވުންތަކުގެ ސޮއި ކުރިތާ 2 ހަފްތާ ނުވަނީސް، ޑިއުޑެލިޖެންސްވެސް ހެދުމަކާ ނުލާ، ބީއެލްއެލްއިން ލޯން ދޫކުރަން ފަށައިފިއެވެ.
“ދިޔަވަރު އޮންލައިން” އަށް މައުލޫމާތު ލިބިފައިވާ ގޮތުގައި ކޮރަޕްޝަންގެ އުސޫލުން މުއިއްޒު ޕްރޮޖެކްޓްތައް ހަވާލުކުރި މި ކުންފުނިތަކަށް ބީއެމްއެލްއިން ނިމިދިޔަ ހަފްތާގައި ޕްރޮޖެކްޓްތައް ހަވާލުކުރަން ފަށާފައިވާއިރު، ބޭންކުގެ ތާރީޚުގައިވެސް މިހާ ކުރު މުއްދަތެއްގައި ބޭންކުން ކުންފުނިތަކަށް ލޯން ދޫކޮށްފައެއް ނުވެއެވެ. އާންމުކޮށް ބޭންކުން މި ވަރުގެ ލޯންތައް އެޕްރޫވްކޮށް ޑިސްބާސް ކުރުމަށް ތިންހަތަރު މަސް ނަގައެވެ.
ފަހުން އެނގިފައިވާ ގޮތުގައި އާންމުކޮށް އިއުލާން ކުރުމަކާ ނުލާ، ރައްޔިތުންގެ މަޖިލިހުގެ މެމްބަރުންގެ މެދުގައި ސަރުކާރުން ބަހާލި 200 ޕްރޮޖެކްޓް އެ ކުންފުނިތަކަށް އެވާޑް ކޮށްފައިވަނީ ކޮންޓްރެކްޓަރ ފައިނޭންސްގެ އުސޫލުންނެއްވެސް ނޫނެވެ.
ކޮންޓްރެކްޓަރ ފައިނޭންސްގެ އުސޫލުން ހިންގާ މަޝްރޫއުތަކަކީ މަޝްރޫއު ހިންގާ ފަރާތުން ޚަރަދުކޮށްގެން ޕްރޮޖެކްޓްތަކަށް ޚަރަދުކޮށްގެން އެފައިސާ ހަމަޖެހިފައިވާ އުސޫލަކުން ސަރުކާރުން ކުންފުނިތަކަށް ފައިސާ ދޫކުރާގޮތަށް ހިންގާ ތަރަރައްގީގެ މަޝްރޫއުތަކެވެ. އަދި އަމުދުން ކޮންޓްރެކްޓަރ ފައިނޭންސްގެ އުސޫލުން ކުރިޔަށް ގެންދަނީ ކޮންޓްރެކްޓަރުންނާއި ފައިނޭންސް ހޯދުމަށް އުދަގޫ، އަދި ބޮޑެތި ހޭދަތަކެއް ކުރާންޖެހޭ ބޮޑެތި ޕްރޮޖެކްޓްތަކެވެ.
އެހެންނަމަވެސް ކޮންޓްރެކްޓަރ ފައިނޭންސްގެ އުސޫލުން ކަމަށް ބުނެ ސަރުކާރުން ކުދި ކުންފުނިތަކަށް އެވާޑް ކޮށްފައިވަނީ އާދައިގެ، ނިސްބަތުން ކުދި ޕްރޮޖެކްޓްތަކެވެ. ”ދިޔަވަރު އޮންލައިން“އަށް މައުލޫމާތުދިން ބީއެލްގެ އިސް އޮފިޝަލަކު ކިޔައި ދިން ގޮތުގައި މި ޕްރޮޖެކްޓްތައް އަމިއްލަ ކުންފުނިތަކާ ހަވާލުކުރުމަށް ބީއެމްއެލްއިން ފައިސާ ހަމަޖައްސާފައިވަނީ މުއިއްޒު އަންގަވައިގެން އެ ބޭންކުގެ ބޯޑުގެ ރުހުމާވެސް ނުލައެވެ. އަދި ކުންފުނިތަކަށް ފައިސާ ދޫކުރުމަށްފަހު މިފައިސާއިން ޚަރަދު ކޮށްގެން ޕްރޮޖެކްޓްތައް ހިންގާއިރު، ބޭންކު ލޯނަށް ޒިންމާވަނީވެސް ދިވެހި ސަރުކާރުން ކަމަށްވެސް ”ދިޔަވަރު އޮންލައިން“އަށް މައުލޫމާތުދިން އޮފިޝަލް ވިދާޅުވިއެވެ.
މިއީ ކޮންޓްރެކްޓަރ ފައިނޭންސްގެ އުސޫލުން ކުރިޔަށް ގެންދާ ޕްރޮޖެކްޓްތަކެއް ނޫންކަން ހާމަ ކުރައްވަމުން ބޭންކުގެ އޮފިޝަލް ވިދާޅުވީ ބޭންކުގެ އުސޫލަކީ ބޭންކުން ލޯން ދޫކުރާ ފަރާތުން ލޯނަށް ޒިންމާ ވުން ކަމަށާއި، އާންމު ފަރާތަކަށް ލޯނު ދޫކުރުމަށްފަހު އެލޯނަށް ސަރުކާރުން ޒިންމާވާ އެންމެ ޒަރޫރީ ހާލަތުގައިވެސް ސަރުކާރުން ވާން ޖެހޭނީ ސަރުކާރުން ސޮވެރިން ގެރެންޓީ ދޫކޮށްފައި ހުންނަ ލޯނުތަކަށް ކަމަށެވެ.
އެހެންނަމަވެސް 200 ޕްރޮޖެކްޓް އާންމުކޮށް އިއުލާން ކުރުމަކާ ނުލާ ސަރުކާރުން ބޭނުންވާ ކުންފުނިތަކާ ހަވާލުކުރިއިރު އެފަރާތްތަކަށް ދޫކުރާ ލޯންތަކަށް އެފަރާތްތަކުން ޒިންމާ ވާން ނުޖެހޭކަމަށްވެސް އޮފިޝަލް ވިދާޅުވިއެވެ. އޭގެ ބަދަލުގައި ބޭންކުން އަމިއްލަ ފަރާތްތަކަށް ލޯން ދޫކުރުމަށް ހަމަޖެހިފައިވަނީ އެ ލޯނު ސަރުކާރުން ބޭންކަށް ދައްކަންޖެހޭ ގޮތަކަށް ކަމަށް ފާހަގަ ކުރައްވަމުން ”ދިޔަވަރު އޮންލައިން“އަށް މައުލޫމާތު ދިން ބޭންކުގެ އޮފިޝަލް ވިދާޅުވީ މިފައިސާ ބީއެމްއެލްއަށް ލިބުމަކީ ވަރަށް ދުރު ކަމެއް ކަމުގައެވެ. އޭގެ ސަބަބެއްގެ ގޮތުގައި އޮފިޝަލް ވިދާޅުވީ ސަރުކާރުގެ ބަޖެޓުގައި ފައިސާ ނެތުމުން، މިހާރުވެސް ސަރުކާރަށް އާންމު ވިޔަފާރިތަކަށް ފައިސާ ދޫނުކުރެވި ވާތީ އެބީދައިން ބޭންކަަށް ސަރުކާރުން މި ފައިސާ ދައްކާން ޖެހިއްޖެ ނަމަ އެފައިސާ އެތައް އަހަރެއް ވަންދެން ބޭންކަށް ނުލިބުމުގެ ފުރުސަތު ވަރަށްވެސް ބޮޑު ކަމުގައެވެ. އޭނާ ވިދާޅުވީ ބޭންކުގެ ބޯޑުގެ ރުހުން ނެތި މިފަދަ މުއާމަލާތެއް ކޮށްފައި މިވަނީ މި މުއާމަލާތަށް ބޭންކު ބޯޑުގެ ރުހުން ލިބޭނެ ގޮތެއް ނޯންނާނެތީ ކަމުގައެވެ. އޭގެ ސަބަބަކީ ބޯޑުގެ މެމްބަރުން ސަރުކާރަށް ތާއީދު ކުރި ނަމަވެސް، ބޭންކުގެ އުސޫލާ ޚިލާފަށް މާލީ މިފަދަ މުއާމަލާތަކަށް ރުހުން ދިނުން އެއީ ކުރެވޭނެ ކަމަކަށް ނުވުމެވެ.
އެހެންކަމުން މުއިއްޒުއަށް ވާގިވެރިވާ މެމްބަރުންގެ ކުންފުނިތަކަށް ބީއެމްއެލްގެ ޑިޕްސޮޓަރީން އެތައް ސަތޭކަ މިލިއަން ރުފިޔާއެއް ޚަރަދު މިކުރަނީ މުއިއްޒުގެ ސިޔާސީ މަންފާ ހާސިލް ކުރުމަށް ދައުލަތުގެ ބޭންކު ގުރުބާން ކޮށްގެންނެވެ. އަދި މި ޖަރީމާގެ ފަހަތުގައި ހުރި އެންމެ އިސް ފަރާތަކީ ބޭންކުގެ މިހާރު ސީއީއޯ ޝަރީފްކަން މިއީ ސާފުކޮށް އެގެން އޮތް އެންމެ ބޮޑު ހަގީގަތަކެވެ. އެއްވެސް ޝައްކެއް ނެތް ގޮތުގައި މިއުސޫލުން ގައުމީ ބޭންކު ގުރުބާން ކޮށްލުމުގެ އެއްވެސް ހައްގެއް ޝަރީފަކަށް ނޯންނާނެއެވެ. އޭނާގެ މައްޗަށް މި ޖަރީމާތަކުގެ ތަހުގީގު ހިންގާ އިންސާފު އޭނާއާއި އަރާ ހަމަކުރާން ޖެހެއެވެ. މިއަދު ނޫނީ މާދަމާއެވެ. އިންސާފުގެ ދިގުއަތް ޝަރީފްއާ މިއަދު ނޫނީ މާދަމާ، ނުވަތަ ކޮންމެވެސް ޒަމާނެއްގައި އަރާ ހަމަ ކުރާނެކަން އޭނާ ދަންނާން ޖެހެއެވެ.
”ދިޔަވަރު އޮންލައިން“އަށް ކަށަވަރު ވެފައިވާ ގޮތުގައި، ރައްޔިތުންގެ މަޖިލިހުގެ މެމްބަރުންގެ މަސްލަހަތުގަ، އާންމުކޮށް އިއުލާން ކުރުމަކާ ނުލާ 200 ޕްރޮޖެކްޓް ކުންފުނިތަކަށް ލޯނު ދޫކުރާ ގޮތަށް ބީއެމްއެލްގެ ސީއީއޯ ޝަރީފް ނިންމީ މުއިއްޒުގެ އަމުރަށެވެ.
