މުއިއްޒުގެ ސަރުކާރުން ހުޅުމާލޭގެ ފޭސް 3 ކުނި އަޅައިގެން ހިއްކި މައްސަލަ އީޕީއޭ އުވާލާފައި އޮތުމުން ބަލާނެ ފަރާތެއް ނެތެވެ. ރައީސް މުއިއްޒު ވަނީ މިފަދަ ކަންކަން ކުރުމަށް އީޕީއޭ އޮތުމުން އުނދަގޫ ވާތީ، އެންވާރުމެންޓަލް ޕްރޮޓެކްޝަން އެޖެންސީ އުވާލާފައެވެ.
އީޕީއޭ އޮތް ނަމަ، ކުނި އަޅައިގެން ހުޅުމާލެ ނުހިއްކޭނެއެވެ. އެތަނުން ދާނީ އެކަން ބަލަމުންނެވެ. އަދި އެފަދަ ކަމެއް ކުރާނަމަ، ސަރުކާރު ޖޫރީމަނާ ކުރާނެއެވެ.
މުއިއްޒު ވަނީ ރައްޔިތަކުން މި ވާހަކަ އޭނާ އާއި ހަމަ އަށް ގެނައުމުން ދޮގު ހަދައި އެކަން ހުޅުމާލެ ފޭސް 1 ގައި ބޭއްވި ބައްދަލުވުމުގައި ފޮރުވަން މަސައްކަތް ކޮށްފައެވެ. ނަމަވެސް އޭގެ ފަހުން ރާއްޖޭގެ ބައެއް ނޫސްވެރިން އެތަނަށް ގޮސް ބެލި ބެލުމުގައި ފުނިފުންޏަށް ކުނި ޖަހައި އެކުނިން ފޭސް 3 ދިޔައީ ހިއްކަމުންނެވެ. އެކަމުގެ ވީޑިޔޯތައް މީޑިޔާއަށް އާންމުވެ، މުއިއްޒު ހެދި ދޮގު ފަޅާ އެރުމުން، އަދި ދިވެހިންނަށް ގެއްލުންވާނެހެން ހިއްކަމުން ދިޔަކަން ސާބިތުވުމުން އަވަހަށް އެޗްޑީސީއިން ބަޔަކު ފޮނުވައި ފޭސް 3 ހިއްކުމަށް އެއްކޮށްފައިވާ ކުނިފުނި ވަނީ އެތަނުން ދުރަށް ޖައްސާފައެވެ.
މުއިއްޒުގެ ސަރުކާރުގެ އަމަލުތަކުގެ ސަބަބުން ދިވެހި ޤައުމަށް އެތައް ޒަމާާނަކަށް ދަނީ ފޫނުބެދޭ ވަރަށް ގެއްލުން ލިބެމުންނެވެ. ރައީސް މުއިއްޒު އީޕީއޭ އުވާލީ މިފަދަ ކަންކަން ކުރުމަށެވެ.
އީޕީއޭ އުވާލުމަށްފަހު، ރާއްޖޭގެ ތިމާވެއްޓާއި، މުޅި ޤައުމަށް ގެއްލުން ވާހެން ދަނީ މުޅި ރާއްޖޭގައި ޕްރޮޖެކްޓްތައް ހިންގަމުންނެވެ. ފުށިދިއްގަރު ފަޅު ހިއްކުމަށް ކުރާ މަސައްކަތުގައި ވެސް ރާއްޖޭގެ ގުދުރަތީ އެތައް ފަރެއް ވަނީ ރައީސް މުއިއްޒު ކިސަޑުން މަރައި ހަލާކު ކޮށްލާފައެވެ.
