ތުރުކީގެ ސަރުކާރުން ދިވެހިރާއްޖެއަށް ހަދިޔާކުރި 1981 ގައި އުފެއްދި ބާ އުޅަނދު ސީޖީއެސް ދަރުމަވަންތަ މިއަހަރުގެ އޮގަސްޓް މަހު ދިވެހިރާއްޖޭގެ ކޯސްޓްގާޑުގައި ރަސްމީކޮށް ބޭނުންކުރަން ފަށައިފިކަމަށް އެންގިއެވެ. މި އުޅަނދަކީ ކުރިން ތުރުކީގެ ކަނޑުމަތީބާރުގައި ޓީސީޖީ ވޯލްކަން ގެ ނަމުގައި ބޭނުންކުރަމުން އައި އުޅަނދެކެވެ.
އުޅަނދުގެ ތަޢާރަފް
ސީޖީއެސް ދަރުމަވަންތައަކީ 58.1 މީޓަރުގެ ދިގުމިނާއި 7.62 މީޓަރުގެ ފުޅާމިނުގައި ބަނދެފައިވާ، 436 ޓަނުގެ އުޅަނދެކެވެ. އެމްއެންޑީއެފްގެ ކޯސްޓްގާޑުގައި މިހާރު ބޭނުންކުރާ އުޅަނދުތަކުގެ ތެރެއިން އެންމެ ބޮޑު އުޅަނދުކަމުގައިވާ މި އުޅަނދު ރާއްޖޭގެ ކަނޑުގެ ސަރަހައްދު ބެލެހެއްޓުމަށް މުހިންމު ދައުރެއް އަދާކުރާނެ ކަމަށް ބެލެވުނެވެ. ނަމަވެސް މި އުޅަނދު މިހާތަނަށް އޮތީ ފަޅުގައި އަޅާފައެވެ. ދުއްވޭނެ ގޮތެއް ނެތިފައެވެ.
ރާއްޖެއަށް މި އުޅަނދު ފޮނުވުމުގެ ކުރިން އުޅަނދު އޮތީ އިސްތަމްބޫލްގެ ޔާޑުގައި މަރާމާތުކުރުމަށް އެހެލާފައެވެ. ބޭނުން ނުކުރެވޭ ވަރު ވެގެންނެވެ.
ދިވެހި ފަޅުވެރިންގެ ތަމްރީން
މި ބޯޓު ދުއްވަން ރާއްޖެއިން ތުރިކީއަށް ސިފައިން ފޮނުވައި 2025 ވަނަ އަހަރުގެ އޭޕްރިލް 7 އިން މެއި 9 އަށް ތުރުކީގައި ޚާއްޞަ ތަމްރީނެއް ފުރިހަމަކުރިއެވެ. މި ތަމްރީންގައި އުޅަނދު ދުއްވުމާއި ސިމިއުލޭޓަރ ބޭނުންކުރުންފަދަ ކަންތައްތައް ހިމެނެއެވެ. އަދި އުޅަނދު ރާއްޖެއަށް ގެނައުމަށްފަހު ތުރުކީގެ ޓެކްނިކަލް ޓީމަކުން ދެ ހަފުތާގެ އިތުރު ތަމްރީނެއް ދިވެހި ފަޅުވެރިންނަށް ދީފައިވެއެވެ.
އޮގަސްޓް 7 ވަނަ ދުވަހު މާލެއަށް އައިސް، 10 ވަނަ ދުވަހު ރަސްމީކޮށް ތުރުކީގެ ދިދަ ތިރިކޮށް، ދިވެހިރާއްޖޭގެ ދިދަ ނެގުމަށްފަހު، އޮގަސްޓް 15 ގައި މި އުޅަނދު “ސީޖީއެސް ދަރުމަވަންތަ” ގެ ނަމުގައި ރަސްމީކޮށް ކޮމިޝަން ކުރެވުނެވެ.
ޚިޔާލު ތަފާތުވުން
މި އުޅަނދު ހަދިޔާކުރުމާގުޅިގެން އެކިއެކި ފަރާތްތަކުން ތަފާތު ޚިޔާލުތައް ފާޅުކޮށްފައިވެއެވެ. ބައެއް ފަރާތްތަކުން ފާހަގަކުރާ ގޮތުގައި މި އުޅަނދަކީ 44 އަހަރު ވެފައިވާ (2026 ގައި 45 އަހަރު ފުރޭ) ބޮޑުވެ ދުވަސްވީ އުޅަނދަކަށްވުމުން، މަރާމާތުގެ ޚަރަދު ބޮޑުވެ، ދިވެހިރާއްޖޭގެ ޑިފެންސް ބަޖެޓަށް އޮތް ބޮޑު ބުރައެކެވެ.
ހަމައެއާއެކު، ބައެއް ފަރާތްތަކުން ސިފަކުރަނީ މިއީ ޓްރަޖެން ހޯސް އެއް ގޮތުގައެވެ. މި އުޅަނދު ބެލެހެއްޓުމުގެ ކަންކަމުގައި މިއަދު ރާއްޖޭގައި ތުރުކީ ސިފައިން އެބަތިއްބެވެ. މިއީ ދިވެހިންގެ މިނިވަންކަމާއި އިސްތިގްލާލަށް މާދުރުގައި އޮތް ގައުމަކުން ވަދެގަންނަން ބޭނުން ކުރި ބާ ދަގަޑުގަނޑެކެވެ.
