އެއްވެސް ޝައްކެއް ނެތް ގޮތުގައި، މިނިވަން ޑިމޮކްރަސީއެއްގައި, ވެރިކަމެއް ޚުދުމުޚްތާރު ވެގެން ދިޔަ ނުދިނުމުގެ ހަގީގީ ޒިންމާ އުފުލާން ތިބޭ ބަޔަކީ އެގައުމެއްގެ ރައްޔިތުންނެވެ. އެ ޒިންމާއަކީ ދައުލަތުގެ މިނިވަން މުވައްސަސާތަކުން އެ އުސޫލުން އުފުލާން ޖެހޭ ޒިންމާއެއްގެ ގޮތުގައި ގާނޫނު އަސާސީގައާއި ގާނޫނުތަކުގެ ލިޔެވި ބަޔާން ކުރެވިފައި އޮތް ނަމަވެސް, ރާއްޖެފަދަ, ކޮރަޕްޝަނުން މޫލާފަ އޮތް, އަދި ޑިމޮކްރަސީގެ ޅަފަތުގައި އޮތް ގައުމެއްގައި އެވާޖިބު އެންމެ ބޮޑަށް މަތިވެފައި އޮންނަނީ ރައްޔިތުންގެ ކިބައިގައެވެ. ސަބަބުތަކެއް ނެތިއެއް ނޫނެވެ.
ގާނޫނު އަސާސީގައި ބަޔާން ކޮށްފައި އޮންނަނީ, ވެރިކަމުގެ އެންމެހާ ބާރުތަކެއް ފެށިގެން އަންނަނީ ރައްޔިތުންގެ ކިބައިން ކަމުގައެވެ. އަދި ވެރިކަމުގެ އެންމެހާ ބާރުތަކެއް ދެމި އޮންނާނީވެސް ރައްޔިތުންގެ ކިބައިގައެވެ. ގާނޫނު އަސާސީގައި ބަޔާން ކޮށްފައިވާ މި މަހުފޫމުގެ ހަގީގީ މާނައަކީ, ވެރިކަމެއް ފާލުން ކައްސާލައިގެން ދިޔަ ނުދިނުމުގެ ބާރުތައް ސީދާ ގާނޫނު އަސާސީން ރައްޔިތުންނަށް ލިބިދިނުމެވެ. އެ ރައްޔިތުން އިންތިޚާބުކުރާ ވެރީން ޒިންމާދާރު ކުރުވުމުގެ އެންމެހާ ޒިންމާއެއް ސީދާ ގާނޫނު އަސާސީން ރައްޔިތުންނާއި މަތި ކުރުމުވެ.
ހަމަ އެއާއެކު ފާހަގަ ކޮށްލާންޖެހޭ އެންމެ މުހިންމު ނުކުތާއަކީ މިޒިންމާ އަދާކުރުމަށް ސީދާ ގާނޫނު އަސާސީން ރައްޔިތުންނަށް ދީފައިވާ ބާރުތަކާއި އިޚްތިޔާރުތަކެވެ. އޭގެ ތެރެއިންވެސް އެންމެ ބޮޑަަށް ފާހަގަ ކޮށްލެވޭ އެންމެ މުހިންމު އިޚްތިޔާރަކީ ނުވަތަ ހައްގަކީ އެއްވެ އުޅުމުގެ މިނިވަންކަމާއި, ޚިޔާލު ފާޅުކުރުމުގެ ހައްގެވެ. އެހެން ގޮތަކަށް ދަންވަނީނަމަ އިހުތިޖާޖު ކުރުމުގެ ހައްގެވެ.
އެއީ ވެރިޔަކުން ޚުދުމުޚްތާރު ވެގެންދިޔަ ނުދިނުމަށް ގާނޫ އަސާސީން ޖަހާދީފައިވާ ކަޑަތަކެވެ. ވެރިމީހާ ޒިންމާދާރު ކުރުވުމަށް ގާނޫނު އަސާސީން މުތުލަގަށް ރައްޔިތުންނަށް ލިބިދީފައިވާ ބާރުތަކެވެ.
އެއްވެސް ޝައްކެއް ނެތް ގޮތުގައި, މުއިއްޒުގެ އަނިޔާވެރިކަމާއި, ދޮގާއި މަކަރާއި, ކޮރަޕްޝަނާއި ފަސާދަ މިވަނީ ހައްދު ފަހައަޅާ ގޮސްފައެވެ. ދިވެހި ތާރީޚު މީގެކުރިން ދެކެފައި ނުވާ މިންވަރަށް, މި ނުރައްކާތެރި ވަބާތައް މިވަނީ މިއަދު މޫލާފައެވެ.
މުއިއްޒުއަށް ބައި އަޅައިގެން, ގޯތި ގެދޮރުންވެސް މިސަރުކާރުގެ ވެރިން ވައްކަން ކުރަނީއެވެ. ރައްޔިތުންގެ ފްލެޓް ލިބުނަ ނުދީ ހިފައްހައްޓާ, އާދައިގެ ނިކަމެތި ރައްޔިތު މީހާގެ މައްޗަށް އަނިޔާވެރި ވަމުންދަނީއެވެ. ޕީއެންސީއަށް ނިސްބަތްވާ މަޖިލިސް މެމްބަރުންނާއި, ވަޒީރުން, ނުއަގުގައި, އުސޫލާ ޚިލާފަށް ހުޅުމާލެއިން ގޯތި ގަނެ, ރައްޔިތުންގެ ހައްގުތަކަށް ވަނީ އަރައިގެންފައެވެ. މުއިއްޒުގެ ސިޔާސީ ކުރިމަގަށް ދައުލަތުގެ މުޅި މާލިއްޔަތު ދަނީ ގުރުބާން ކުރަމުންނެވެ.
ގާނޫނު އަސާސީވެސް, ރައްޔިތުންގެ ގާތުގައި “ހޭވެސް” އަހާ ނުލާ, އެންމެ 12 ގަޑިއިރުތެރޭ ބަދަލު ކޮށްލީއެވެ. މުއިއްޒުގެ އަމިއްލަ ސިޔާސީ މަސްލަހަތު ހިމާޔަތް ކުރުމުގެ މަގުސަދުގައެވެ. ސުޕްރިމްކޯޓުގެ ބެންޗު ތިމާ ހިތް ރުހޭ ގޮތަކަށް ބަދަލު ކޮށްލީއެވެ. ކޯޓުތަކަށް އަތްބާނާ، މުޅި ގައުމު ފަސާދަ ކޮށްފިއެވެ. އެންމެ ފަހުން މުއިއްޒު ދިމާކޮށްލީ ގާނޫނު އަސާސީން މުތުލަގަށް ދީފަ އޮތް ނޫސްވެރިކަމުގެ މިނިވަންކަން ނިގުޅަައިގަންނާށެވެ. މުއިއްޒުގެ ވެރިކަމުގައި ޑިމޮކްރަސީ ފުނޑާލުމުގެ ބޭނުމުގައި، ދިއްލިފައިހުރި އެ ނިޒާމުގެ އެންމެ ފަހިގެ ހުޅުކޮޅު ނިއްވާލުމުގެ ބޭނުމުގައެވެ.
ރައްޔިތު މީހާ ނިކަމެތި ވެއްޖެއެވެ. އަނގަޔާ އަތާ ދިމާނުވާ ހާލަތަށް, ރައްޔިތުން ނިކަމެތި ވެއްޖެއެވެ. ފްލެޓްތައްވެސް ބަހާލަމުން ދަނީ ސާޖިދާގެ ލިސްޓަށާއި, މަޖިލިސް މެމްބަރުންގެ ލިސްޓުތަކަށެވެ.
މިއީ ހަގީގައިވެސް މިރާއްޖޭގެ ތާރީޚު މިއުސޫލުން މީގެ ކުރީން ދެކަވައިވާ ކަންކަން ނޫންކަމުގައި ދަންނަވާން ޖެހެއެވެ.
މިހާލަތަށް ގައުމެއް ދިއުމުން, އަދި އެގައުމެއްގެ ސަރުކާރު ފަސާދަވެ އަނިޔާވެރި ވުމުން, އެސަރުކާރެއް ޒިންމާދާރު ކުރުމުގެ ޒިންމާ އުފުލާން ތިބޭނީ ރައްޔިތުންނެވެ. ރައްޔިތުން ނިކުމެ އެރައްޔިތުންގެ ބާރު ދައްކާލުމުން ސަރުކާރު ކުޑަކަކޫ މައްޗަށް ތިރިވާން މަޖުބޫރުވާނެއެވެ.
އަވައްޓެރި ސްރީލަންކާއިންނާއި ބަންގްލާދޭޝްއިންނާއި އަދި އެނޫނަސް ދުނިޔޭގެ އެތައް ގައުމަކުން މިހަގީގަތުގެ ދިރިހުރި މިސާލުތައް ދަނީ ފެންނަމުންނެވެ. މިކަންކަމުން މިސާލު ނަގާ, އައްޔަކަސް އަނދިރިއަކަސް ވާނީ އެއްވަރޭކަމުގައި ނުބުނެ, އަނިޔާވެރި އަދި ދޮގުވެރި މުއިއްޒު ޖަވާބުދާރީ ކުރުވުމަށް އިހުތިޖާޖަށް ނިކުތުން މިއަދު މިވަނީ ރައްޔިތުންގެ މައްޗަށް ވާޖިބުވެފައެވެ.
ދިވެހިންގެ ފުލުހުންގެ ހިސާބުތަކުން އަބަދުވެސް ކޮށްފައި އޮންނަ އަންދާޒާއަކީ މާލޭގެ މަގުތަކަށް 10،000 މީހުން ޖަމާވެ އިހުތުޖާޖު ފަށައިފިނަމަ، އެ އިހުތިޖާޖު ކޮންޓްރޯލް ކުރުމުގެ ކެޕޭސިޓީ ފުލުހުންގެ މުވައްސަސާގައި ނުހުންނާނެ ކަމަށެވެ. އެހާލަތުގައި ކުރިމަތިވެގެންދާ އެއަށްވުރެ ބޮޑު ނުރައްކަލަކީ އަފަދަ ހާލަތެއްގައި ފުލުހުންގެ ތެރެއިންވެސް ގިނަ އަދަދެއްގެ ބަޔަކު އާންމު ރައްޔިތުންނާ ބައިއަތު ހިފާނެކަމުގެ ބިރެވެ. އެކަމުގެ ނުރައްކަލެވެ. އަމުދުން އަނގަޔާއި އަތާ ދިމާނުވެ، އާންމު ރައްޔިތުން ބިކަވެ ނިކަމެތިވެފައިވާ މިފަދަ ހާލަތެއްގައި އެ ނުރައްކާ އިންތިހާއަށް ބޮޑުކަމަށްވެސް ފުލުހުން ހިސާބު ޖަހާފައި ވެއެވެ.
އާދޭހެވެ! އޮކްޓޯބަރ 3 ވާ ހުކުރު ދުވަހަކީ މުއިއްޒު ޖަވާބުދާރީ ކުރުވާ, މިސަރުކާރުގެ ކޮރަޕްޝަނާއި ފަސާދަ ހުއްޓުވުމަކަށް ގެނެސް, އަނިޔާވެރި މުއިއްޒު “ސައިޒް” ކުރުމަށް އެންމެހާ ރއްޔިތުންވެސް މަގުތަކަށް ނިކުންނާވީ ދުވަހެވެ. އެއީ މި ޚުދުމުޚްތާރު ވެރިކަމަށް ނިމުން ގެނައުމަށްޓަކާ ހުރިހާ ދިވެހި ރައްޔިތުން ކަމަރު ބަންނާނެ ދުވަހެވެ. އެއީ މި ޚުދުމުޚަތާރު ވެރިން ކުޑަކަކޫ މައްޗަށް ދިރިވެ، ދިވެހި ތާރީޚުގައި ރަން އަކުރުން ލިޔެވިގެންދާނެ ދުވަހެވެ. އެއީ ގާނޫނީ އިމުގެ ތެރެއިން މުއިއްޒުގެ ވެރިކަން ނިމުމަކަށް ގެނެސް، ކޮރަޕްޝަނާއި ފަސާދަ ނިމުމަކަށް ގެންނާނޭ ދުވަހެވެ.
ބޭނުންވަނީ ހަމަ އެކަނި 10،000 މީހުން މަގުތަކަށް އިހުތިޖާޖަށް ނިކުތުމެވެ. މުއިއްޒުގެ އަނިޔާވެރިކަމާއި، ކޮރަޕްޝަނާއި ފަސާދައާއި ދެކޮޅަށް އަޑު އުފުލުމެވެ. އެހާތަނުން މުއިއްޒު ވެގެންދާނީ މިގައުމުގެ ހިތި މާޒީ ކަމުގައެވެ. ރައްޔިތުން ކަށިން ހިތްވަރު ނެރެ، ގައުމަށްޓަކާ ގުރުބާންވާންވީ ވަގުތު މިއޮތީ އައިސްފައެވެ.
