ވެރިކަން ކުރާ ޕީއެންސީގެ ފަރާތުން މާލޭ ސިޓީގެ މޭޔަރު ކަމަށް ވާދަކުރައްވާ މޫސާ އަލީ ޖަލީލަށް ޓިކެޓް ހަވާލުކޮށް، މާލޭގެ ރައްޔިތުންގެ ތާއީދު ހޯދުމަށް ދޮރުން ދޮރަށް ހިންގަވަން ފަށައިފިއެވެ. މި ކެމްޕެއިންގެ ފޯރި ގަދަވެފައިވާއިރު، މިއަދު ބޭއްވުނު ޚާއްސަ ހަރަކާތެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ބައިވެރިވެވަޑައިގެން މޫސާ އަލީ ޖަލީލަށް ފުރިހަމައަށް ތާއީދުކުރައްވާކަން ހާމަކުރައްވާފައެވެ.
މި އިވެންޓުގައި ވާހަކަފުޅު ދައްކަވަމުން މުއިއްޒު ވިދާޅުވީ، މޫސާ އަލީ ޖަލީލަށް ޕީއެންސީގެ ޓިކެޓް ދެއްވީ ސީދާ އެމަނިކުފާނުގެ އެންގެވުމުގެ މަތިން ކަމަށެވެ. އަދި ސަރުކާރުން ބޭނުންވާ ސްޕީޑުގައި މާލެ ތަރައްގީ ކުރެވޭނީ މޫސާ އަލީ ޖަލީލު މާލޭގެ މޭޔަރުކަމަށް އިންތިޚާބު ކޮށްގެން ކަމަށްވެސް މުއިއްޒު ވަނީ ފާހަގަ ކުރައްވާފައެވެ.
މުއިއްޒާއި ސަރުކާރުގެ އިސްވެރިންގެ ފަރާތުން މޫސާ އަލީ ޖަލީލަށް ބޮޑު ތާއީދެއް އޮތް ނަމަވެސް، އާންމުންނާއި ސިޔާސީ މަސްރަހު ދިރާސާ ކުރާ ފަރާތްތަކުން ދަނީ އޭނާގެ ސިއްހީ ހާލަތާއި ގާބިލިއްޔަތުކަމާމެދު ބޮޑެތި ސުވާލުތަކެއް އުފައްދަމުންނެވެ.
މޫސާ އަލީ ޖަލީލުގެ އަރިސް ބޭފުޅުންނާއި ބައެއް ރައްޓެހިން ކަށަވަރުކޮށްދޭ ގޮތުގައި، އޭނާއަކީ ސިކުނޑީގެ މައްސަލަ (Cognitive issues) ހުންނަ ބޭފުޅެކެވެ. މިކަމުގެ ސަބަބުން އޭނާއަކީ އާދަޔާ ޚިލާފަށް ކަންކަން ހަނދާން ނެތޭ މީހެއްކަން ފާހަގަކުރެވިފައިވެއެވެ. މީގެ އިތުރުން، އެންމެ ކަންބޮޑުވާ ކަމެއްގެ ގޮތުގައި ފާހަގަކުރެވެނީ، އެއްފަހަރު ދިމާވާ މީހަކު ދެވަނަ ފަހަރަށް ފެނުމުން އެއީ ކާކުކަން ވަކިކުރަން ނޭނގޭ މައްސަލައެވެ.
މާލެ ފަދަ ތޮއްޖެހިފައިވާ، އަދި ގިނަ ރައްޔިތުންތަކެއްގެ ޚިދުމަތާ ގުޅިފައިވާ ތަނެއް ހިންގުމަށް ހަވާލުކުރާ ފަރާތަކީ ވިސްނުން ތޫނު، އަދި ރައްޔިތުން ދަންނަ މީހަކަށް ވާންޖެހޭއިރު، މީހުން ވަކިކުރަން ނޭނގޭ އަދި ހަނދާން ބަލި ބޭފުޅަކު އެ މަގާމަށް ގެނައުމަކީ ޒިންމާދާރުކަމެއްތޯ ގިނަ ބަޔަކު ދަނީ ސުވާލު ކުރަމުންނެވެ.
“މާލެ ތަރައްގީ ކުރާނީ ޖަލީލު ކަމަށް ރައީސް ވިދާޅުވާއިރު، މީހުން ވަކިކުރަން ނޭނގޭ، އަދި ކަންކަން ހަނދާން ނެތޭ މީހަކު މޭޔަރުކަމުގެ ގޮނޑީގައި ބައިންދައިގެން މާލެ ތަރައްގީ ކުރާނީ ކިހިނެއްތޯ؟ މިއީ ރައްޔިތުން ވިސްނަންޖެހޭ ކަމެއް،” ނަން ހާމަކުރަން ބޭނުން ނުވާ، މޫސާ ޖަލީލުގެ ސިނކުޑީގެ ހާލަތާއި ގުޅޭގޮތުން “ދިޔަވަރު އޮންލައިން” އާ ވާހަކަ ދެއްކި އޭނާގެ ގާތް ރަހުމަތްތެރިއަކު ވިދާޅުވިއެވެ. މޫސާ އަލީ ޖަލީލްގެ ގާތް ރަހުމަތްތެރިޔާ ވިދާޅުވި ގޮތުގައި، މޫސާ އަލި ޖަލީލް މޭޔަރުކަމަށް މުއިއްޒު ނެރުއްވީ އެހެން އެއްވެސް ގޮތެއް ނެތިގެންކަން ޚުދު މޫސާ އަލި ޖަލީލަށްވެސް އެނގޭކަމަށެވެ. އެހެންނަމަވެސް އޭނާގެ ސިނކުޑީގެ މައްސަލަތައް ހުއްޓެއަކަމަކު، އެ ކަންކަމުގެ ސަބަބުން މޭޔަރުކަމުގެ ޒިންމާ އަދާކުރުމަށް ހުރަސް އެޅޭނެކަމަށް މޫސާ އަލީ ޖަލީލު ގަބޫލު ނުކުރައްވާކަމަށްވެސް “ދިޔަވަރު އޮންލައިން” އާ ވާހަކަ ދެއްކި މޫސާ އަލީ ޖަލީލްގެ ގާތް ރަހުމަތްތެރިޔާ ވިދާޅުވިއެވެ.
އެހެންނަމަވެސް، މޫސާ އަލީ ޖަލީލުގެ ސިއްހީ ހާލަތާ ގުޅޭގޮތުން ދެކެވޭ މި ވާހަކަތަކަކީ އޭނާގެ ގާތް އެކުވެރިންވެސް ޔަގީންކޮށްދޭ ހަގީގަތްތަކެއް ކަމަށްވާއިރު، މާލޭގެ މޭޔަރުކަމަށް އޭނާ ހޮވުމަކީ މާލޭގެ ތަރައްގީއަށް އެޅިގެންދާނެ ހުރަހެއް ކަމަށް ބެލެވޭ ޖާގަ އެބައޮތެވެ.
