މިދިޔަ ބުރާސްފަތި ދުވަހު ‘އަދަދު’ ނޫހުން ޝާއިއުކުރި ސިޔާސީ ކާޓޫނެއްގެ މައްސަލަ މީޑިއާ ކޮންޓްރޯލް ކޮމިޝަނުން ހަރުކަށި ގޮތެއްގައި ކުރިއަށް ގެންދާން ފަށައިފި އެވެ. އެކަމަކު މި މައްސަލައިގައި ފާހަގަކޮށްލަންޖެހޭ މުހިންމު ނުކުތާއަކީ، ސިޔާސީ ފިލާވަޅެއް ދީނީ މައްސަލައަކަށް ބަދަލުކޮށް، މީޑިއާތަކުގެ މިނިވަންކަމަށް ހުރަސްއެޅުމަށް މަސައްކަތްކުރާ ކަމުގެ އަމަލީ ނަމޫނާއެއް މީޑިއާ ކޮމިޝަންގެ ފަރާތުން ފެނިގެން ދިއުމެވެ.
އެ ކާޓޫނުގައި ދައްކުވައިދީފައިވާ ތަސްވީރުގައި، ނަމާދުގެ ޖަމާއަތުގައި ތިބި މީހުންގެ ތެރެއިން ރައީސް މުއިއްޒުގެ ސިފަ ފެންނަ މީހަކު އިމާމު މީހާގެ ޖީބުން ފައިސާ ވަގަށް ނަގަމުންދާ މަންޒަރު ފެންނާން ހުރެ އެވެ. ފެންނަ މަންޒަރަށް ބަލާއިރު އެއީ ސީދާ ގޮތުން ރިޝްވަތާއި ގުޅުންހުރި ހާދިސާއެއް ތަސްވީރުކޮށްދޭ ކުރެހުމެކެވެ. އިތުބާރުހުރި މަގާމެއްގައި ހުރި މީހަކު އެ އިތުބާރާ ހިލާފުވެ، ރައްޔިތުންގެ ފައިސާ ވަގަށްނަގާ ކަމުގެ މާނަ އެ ކާޓޫންނުން ދޭހަވެއެވެ. ހަމައެއާއެކު މިފަދަ ކާޓޫނެއް ކުރަހަން ޖެހުނު ސަބަބަކާމެދު ވިސްނާމަކަމާތޯއެވެ. މި ކާޓޫން ކުރަހަން ޖެހުނީ، ރައީސް މުއިއްޒުގެ ސަރުކާރުގައި ކޮރަޕްޝަނާއި ރިޝްވަތުގެ ތުހުމަތުތައް އިތުރުވަމުން ގޮސް، ދައުލަތުގެ އެކި ގިންތިތަކުގައި ކޮރަޕްޝަންގެ އަމަލުތައް ހައްދުން ނެއްޓިފައި ވަނިކޮށެވެ. އެހެންކަމުން ހުރިހާ ގޮތަކުން ބެލިކަމުގައިވި ނަމަވެސް މި ކާޓޫން ކުރަހާފައިވަނީ ޒިންމާދާރުވާންޖެހޭ މަގާމުތަކުގައި ތިބި ބޭފުޅުން އެ މަގާމުތައް ބޭނުންކޮށްގެން ކޮރަޕްޝަންގެ ކަންކަން ހިންގާކަން ފާހަގަކޮށްދިނުމުގެ ގޮތުންކަން ވަރަށްވެސް ރަގަޅަށް ހާމަކޮށްދެއެވެ. އަދި މިއަދު ރާއްޖޭގައި ކޮރަޕްޝަންގެ އަމަލުތައް ހިންގުމުގައި ހުއްޖަތެއް ކަމުގައި ދީން ހަދާ، އުމްރާގެ އަޅުކަމާއި ހައްޖުގެ އަޅުކަމާއި ގުޅުންހުރި އެކިކަންކަން މެދުވެރިކޮށް ކަރަޕްޝަންގެ ހުތުރު އަމަލުން ހިންގަމުންދާއިރު، މި ކާޓޫން، ރާއްޖޭގައި ކަރަޕްޝަންގެ އަމަލުތައް ފެތުރި ހަރުލާފައިވާ މިންވަރު ވަރަށްވެސް ރަޅަށް ދޭހަކޮށްދެއެވެ.
ކާޓޫނުގައި ނަމާދު ފަދަ އަޅުކަމެއް ކުރުމަށް ސަޖިދާގައި އޮތް މީހުންގެ ސިފަ ފެންނަ ނަމަވެސް، އެއީ ދީނާއި ގުޅުންހުރި ކާޓޫނެއް ނޫނެވެ. އެއީ ރިޝްވަތާއި ކޮރަޕްޝަނާއި ގުޅުންހުރި ސިޔާސީ ކާޓޫނެކެވެ. ނަމާދުގެ މަންޒަރު ބޭނުންކުރީ، މީހުން އިތުބާރުކުރާ، ޝަރަފްވެރި ކަމަށް ބެލޭ ދިރިއުޅުމެއް ދިރިއުޅޭ ކަމަށް ދައްކުވައިގެން، ރައްޔިތުންނަށް އޮޅުވާލައިގެން، ނުބައި ކަންކަން ހިންގާ މީހުންގެ މުނާފިގުކަން ދައްކުވައިދިނުމަށެވެ. ދީނީ ގޮތުން ބަލާނަމަ، އިސްލާމްދީނުގައި ރިޝްވަތާއި ކޮރަޕްޝަން އެންމެ ބޮޑަށް ހަރާމްކުރައްވާފައިވާ ކަންކަމުގެ ތެރޭގައި ހިމެނެ އެވެ. އަދި އާންމުންނަށް ޚިދުމަތްކުރުމަށް ލިބިފައިވާ މަގާމުތައް ބޭނުންކޮށްގެން ފައިދާ ނެގުމަކީ އިސްލާމްދީން ބަލައި ނުގަންނަ ކަމެކެވެ. އެހެންކަމުން، އެކަން ފާހަގަކޮށްދިނުމަށް ކުރި މަސައްކަތް ދީނީ ގޮތުން މައްސަލައެއް ކުރަންވީ ސަބަބެއް ނެތެވެ.
މީޑިއާ ކޮމިޝަނުން ފުރަތަމަ ނެރުނު އިއުލާނުގައި، “އެއްވެސް ފަރާތަކުން” އެ ޕޯސްޓް ދައުރު ނުކުރުމަށް އަންގާފައިވި އެވެ. އެއީ އާންމު ރައްޔިތުންނަށްވެސް އެ ކޮންޓެންޓް ޝެއާކުރުން މަނާކުރުމުގެ މާނަ އެވެ. ނަމަވެސް މި އިއުލާން ވަނީ ސޯޝަލް މީޑިއާއިން ޑިލީޓްކޮށް، ފަހުން އާ އިއުލާނެއް ނެރެ، “މީޑިއާތަކުން” އެކަން ނުކުރުމަށް އަންގާފަ އެވެ. މިއީ ކޮން ސަބަބަކާހުރެ ގެނައި ބަދަލެއްކަން ސާފެއް ނޫނެވެ. އެކަމަކު މި ބަދަލުން ވެސް އެނގެނީ، ފުރަތަމަ އިއުލާން ނެރުނީ ވިސްނުމެއްނެތި، އަވަހަށް ކަމެވެ. ރައްޔިތުންގެ އަސާސީ ހައްގުތަކަށް އުނިކަން އަތުވެދާނެ ގޮތަކަށް ފިޔަވަޅު އަޅާން މަސައްކަތްކުރީ ކަމެވެ.
ސިޔާސީ ފިލާވަޅުތައް އާންމު ކުރުމުގެ މިނިވަންކަމާއި، މީޑިއާގެ މިނިވަންކަން ދިފާއުކުރުމަކީ ޑިމޮކްރެސީގެ އަސާސްތަކެވެ. ސަރުކާރުތަކުގެ ކޮރަޕްޝަނާއި ނުބައިކަންތައްތައް ފާހަގަކޮށްދިނުމަށް މީޑިއާއަށް ހުރަސްއެޅުމަކީ، ޒިންމާދާރުކަން ނެތް، ބާރުގެ ބޭނުންކޮށްގެން އަނިޔާވެރި ގޮތުގައި ހިންގާ ވެރިކަމަކަށް އެގޮތް ބަދަލުވެދާނެ ގޮތެކެވެ. “ދީން ރައްކާތެރިކުރުން” ކައްފާރާއަކަށް ހަދާ، ސިޔާސީ ފިލާވަޅުތަކަށް ހުރަސްއެޅުމަކީ، ދީނާއި ސިޔާސަތު އެއްކޮށްލައި، ރައްޔިތުންގެ މެދުގައި ހިތްހަމަނުޖެހުން އުފެއްދުމުގެ މަސައްކަތެކެވެ. މިފަދަ އަމަލުތަކުން ރައްކާތެރިވާން، އެންމެން ވިސްނުން ހިންގަންޖެހެ އެވެ.
‘އަދަދު’ ނޫހުން ޝާއިއުކުރި ކާޓޫނަކީ ރިޝްވަތާއި ކޮރަޕްޝަންގެ މައްސަލަ ފާހަގަކޮށްދޭ ސިޔާސީ ކާޓޫނެކެވެ. އެކަން ދީނީ މައްސަލައަކަށް ބަދަލުކޮށް، މީޑިއާތަކަށް ހުރަސްއެޅުމަށް މަސައްކަތްކުރާކަން މި މައްސަލައިން ވަރަށްވެސް ރަގަޅަށް ސާފުވެއެވެ. ރައްޔިތުންގެ ފައިސާ ރައްކާތެރިކުރުމުގެ ޒިންމާ ނަގައިގެން، ކޮރަޕްޝަންއާ ދެކޮޅަށް އަޑުއުފުލުމަށް ބަދަލުގައި، އެކަން ފޮރުވައި، ރަގަޅު ގޮތުގައި ސަރުކާރުން ޒިންމާދާރު ކުރުމަށް ކުރާ މަސައްކަތްތައް ހުއްޓުވުމަށް ހިންގާ ބިރު ދެއްކުމުގެ އަމަލުތަކަކީ، ހަގީގީ ދީންދެކެ ނުވަތަ ރައްޔިތުންދެކެ އޮތް ލޯތްބަކުން ކުރާ ކަމެއް ނޫނެވެ. އެއީ ރައްޔިތުން އޮޅުވާލުމުގެ، ވަކި ބަޔަކަށް ފައިދާ ކޮށްދިނުމުގެ ސިޔާސީ ކުޅިވަރެކެވެ.
