ޕެސިފިކްގެ ކުޑަކުޑަ ޖަޒީރާ ޤައުމެއް ކަމުގައިވާ ޕަލާއު ވަނީ ޗައިނާއިން އެގައުމުގެ އިސްތިޤްލާލަށް ނުފޫޒު ފޯރުވައި، އެ ޤައުމުގެ މިނިވަންކަމަށް އަރައިގަނެފައެވެ.
ޗައިނާގެ މި ނުފޫޒުގެ މައިގަނޑު ބޭނުމަކަށްވެފައިވަނީ ޕަލާއުއިން ތައިވާން ގަބޫލުކުރުން ހުއްޓުވުމާއި، އެމެރިކާއިން އެތަނުގައި ޤާއިމްކޮށްފައިވާ އަދި ޤާއިމްކުރަން ބޭނުންވާ އަސްކަރީ ބިނާތަކަށް ހުރަސްއެޅުން ކަމަށް ބެލެވެއެވެ.
ޗައިނާއިން ދަނީ، އެ ޤައުމުގެ މިނިވަންކަން ނަގާލުމަށް ތަފާތު އެކިއެކި ކަންކަން ކުރަމުންނެވެ. މިގޮތުން ޗައިނާގެ ވިޔަފާރިވެރިން ލައްވައި އެމެރިކާގެ އަސްކަރީ މަރުކަޒުތައް ކައިރިން ޗައިނާއިން ބިން ގަތުމުން ފެށިގެން ފައިސާ ބަހައިގެން އިންތިހާބުތައް ގަތުން ފަދަ ކަންކަމުގައި ޗައިނާ އަދާ ކުރާ ދައުރަކީ އެ ޤައުމުގެ މިނިވަންކަމަށް އޮތް ވަރަށް ބޮޑު ގޮންޖެހުމެކެވެ.
އަމާން ޖަޒީރާ ޤައުމެއްކަމުގައި އޮތް ޕަލާއު މިހާރު ވަނީ ޣައިރު ޤާނޫނީ ހަރަކާތްތަކުގެ ހާއްޔަކަށް ބަދަލުވެފައެވެ. މަސްތުވާތަކެތި އެތެރެކުރުމާއި، އޮންލައިން ޖުވާ ކުޅުމާއި، ފައިސާ ދޮވުމާއި، ހަށިވިއްކުމުގެ ވިޔަފާރި ހިންގުން ފަދަ ކަންކަން ޗައިނާގެ ފަރުދުންނާއި ގޭންގުތަކާ ގުޅިގެން އެ ޤައުމުގައި ހިންގަމުގެ ތުހުމަތު ޗައިނާގެ ސަރުކާރަށް ކުރެއެވެ.
ޗައިނާގެ ގޭންގުތަކުން ވަނީ ޕަލާއުގެ މަތީ ފެންވަރުގެ ސިޔާސީ މީހުންނާ ވަނީ ގާތް ގުޅުމެއް އުފައްދާފައެވެ. ޕަލާއުގައި ހުންނަ އެމެރިކާގެ އެމްބަސީއިން ޕަލާއުގެ އިސްވެރިންނަށް ފޯރުކޮށްދިން ދެ އިންޓެލިޖެންސް ރިޕޯޓްގެއް ބުނާގޮތުން، ޗައިނާއިން ވަނީ ސިޔާސީ ބަޔަކަށް ބޮޑު އަދަދުން ރިޝްވަތު ދީފައެވެ. މި ރިޕޯޓްގައި ޗައިނާއިން ސިޔާސީ ފަރާތްތަކާއި އެކު ޤާއިމު ކޮށްފައިވާ ސިއްރު ގުޅުންތަކުގެ ވާހަކަވެއެވެ.
ޕަލާއުގެ ރައީސް ސުރެންޖެލް ވިޕްސް ޖޫނިއަރ ވަނީ ކުރީގައި ޗައިނާގެ އެމްބަސެޑަރަކު އޭނާއަށް ގުޅާފައި “ތައިވާން ގަބޫލުކުރުން ހުއްޓާލުމަށް” ބާރުއަޅާފައިވާކަމަށް ހާމަކޮށްފައެވެ. އޭގެ އިތުރުން، 2008 އަހަރު ޕަލާއަށް ޗައިނާގެ 634 ފަތުރުވެރިން އައިއިރު، 2015 ވަނަ އަހަރާހަމައަށް މި އަދަދު 91,000 އަށްވުރެ އިތުރަށް ގޮސް، ޕަލާއަށް އަންނަ މުޅި ފަތުރުވެރިންގެ 54% ހިއްސާކުރިއެވެ. ނަމަވެސް، ނޮވެމްބަރ 2017 ގައި ކުއްލިގޮތަކަށް ޗައިނާގެ ޓުއަރ އޮޕަރޭޓަރުންނަށް ޕަލާއަށް ޕެކޭޖް ވިއްކުން ހުއްޓާލުމަށް އަންގާފައިވުމުން، ފަތުރުވެރިކަމުގެ ކުއްލި ހީނަރުކަމެއް ޕަލާއަށް ކުރިމަތިކޮށް މުޅި އިޤްތިޞާދު އެއްކޮށް ޗައިނާއިން ފުނޑާލީ ޗައިނާ ބޭނުންހާ ކަމެއް ޕަލާއުގެ ސަރުކާރުން އޭރު ނުކުރާތީއެވެ.
ޗައިނާއިން ޕަލާއުގެ ފޯނު ނެޓްވަރކުން ކޯލް ތައް އަޑު އަހާ ކަމަށާއި، މިކަން ކުރަމުްނދަނީ އެ ޤައުމުގައި ޤާއިމުކޮށްފައިވާ ހުވާވޭ ޑިވައިސްތަކުން ކަމަށް އެ ޤައުމުގެ ލީޑަރުން ހާމަ ކޮށްފައިވެއެވެ.
2024 ވަނަ އަހަރު ނޮވެމްބަރ 5 ވަނަ ދުވަހު އޮތް ޕަލާއުގެ ރިޔާސީ އިންތިޚާބާއި ގުޅިގެން، ޗައިނާގެ ހަރަކާތްތައް އިތުރުވެފައިވެއެވެ. މި އިންތިޚާބުގެ ނަތީޖާއިން ޕަލާއުގެ ޤައުމީ މިނިވަންކަމާއި ސިޔާދަތަށް ބޮޑެތި އަސަރުކޮށްފާނެކަން ގިނަ ޑިޕްލޮމެޓުންނާއި ސަލާމަތީ ބާރުތަކުން ދިޔައީ ފާހަގަ ކުރަމުންނެވެ. ޗައިނާއިން ދަނީ ފައިސާގެ ނުފޫޒު ފޯރުވައިގެން 20،000 މީހުން އެ ޤައުމުގެ އާބާދީ ގަނެލުމުގެ މަސައްކަތް ކުރަމުންނެވެ.
ޗައިނާ އާއި ދެކޮޅުވާ ފަރާތްތަކަށް އަނިޔާވެރި ވަމުންދާ ވަހާކަ ތަކަކީވެސް ފާހަގަ ކޮށްލެވޭ ވާހަކަ ތަކެކެވެ. މި ގޮތުން ފާހަގަކޮށްލެވޭ އެއް ހާދިސާއަކީ މީހަކު މަރާލުމަށްފަހު އެމީހާގެ ފޮށްޓެއްގައި އުފުލާފައިވާ މައްސަލައެވެ. އަދި ދެވަނަ ހާދިސާއަކީ ރޭވިގެން މީހަކު ކިޑްނެޕް ކޮށްގެން އޭނާ ބޯޓެއްގައި ޕަލާއުއިން ބޭރަށް ގެންގޮސް، ޗައިނާގެ ޖަލަކަށް ލާފައި ކަމަށް ދެކެވޭ ވާހަކައެވެ.
ޕަލާއު ސަރުކާރުން ވަނީ ޗައިނާގެ ނުފޫޒު ކަނޑުވާލުމަށް ގިނަ މަސައްކަތްތަކެއް ކޮށްފައެވެ. ޕޮލިސް އޮޕަރޭޝަންތަކުން 2019 އަދި 2020 ވަނަ އަހަރުތަކުގައި 200 އަށްވުރެ ގިނަ ޗައިނާގެ ފަރާތްތައް ހައްޔަރުކޮށް، ޗައިނާގެ ރައްޔިތުންނަށް ނިސްބަތްވާ ގިނަ އަދަދެއްގެ އޮންލައިން ޖުވާ ހިންގާ ތަންތަން ރޭޑްކުރެވުނެވެ. މި ރޭޑްތަކުން ހޯދުނު މަޢުލޫމާތުތަކުން ހާމަވީ އޭޝިއާގެ ބޮޑެތި ކުށްކުރާ ގްރޫޕްތަކާ ގުޅުންހުރި އޮންލައިން ކެސިނޯ ގްރޫޕެއް ޕަލާއުގައި ޤާނޫނާއި ޚިލާފަށް ހަރަކާތްތެރި ވަމުންދާކަމެވެ.
މީގެ އިތުރުން ޕަލާއުގެ ކަނޑުގެ ސަރަހައްދަށް ހުއްދަ ނެތި ވަދެ ބިރުދެއްކުން ވަނީ އާންމުވެފައެވެ. މިކަން ކުރަނީ ޗައިނީސްގެ ކަނޑުގެ ސިފައިންލައްވައެވެ.
މިއީ މިނިވަން ޤައުމެއްގެ މިނިވަންކަމަށް ޗައިނާއިން އަރާގެންފައިވާ މިންވަރެވެ. ކުދި ޖަޒީރާ ޤައުމުތަކަށް ޗައިނާގެ ފަރާތުން ކުރިމަތިވެފައިވާ ގޮންޖެހުންތައް ބޮޑެވެ. ޗައިނާއަކީ ހަންފެތުރުމާއި، ބިން ބޮޑު ކުރުމާއި، ކަނޑުގެ ބާރުތައް ބޮޑު ކުރުމުގެ މައްޗަށް އެމީހުންގެ ސިޔާސަތު ތައް އެކުލަވާލާފައިވާ ޤައުމެކެވެ.
އޮގޮތުން ރާއްޖޭގެ ކަނޑުތަކުގެ އަޑީގައި ޗައިނާއިން ވަނީ ގިނަ އަދަދެއްގެ ގޮތް ނޭނގޭ ޑިވައިސްތަކެއް މުއިއްޒަށް ރިޝްވަތު ދީގެން ހަރުކޮށްފައެވެ.
