ޖުވާ ކުޅުމަކީ އިސްލާމް ދީން ޚަރާމް ކޮށްފައިވާ ކަމެކެވެ. އެއީ މިހާރުވެސް ދިވެހިރާއްޖޭގެ ޤާނޫނު އަސާސީގައި އަދި ޤާނޫނުގައިވެސް މަނާ ކަމެކެވެ. އަދި އެކަން ހުއްޓުވުމަށް އަދަބުވެސް ދެވެން އޮތް ކަމެކެވެ. މަނާ ނުކުރެވިގެން މި އުޅެނީ، އޮންލައިން ފޮރެކްސް އާއި، ކްރިޕްޓޯ ޓްރޭޑިންގ އާއި އެފަދަ އޮނަލައިން ޑޭ-ޓްރޭޑިންގ ކުރުމެވެ.
މުއިއްޒުގެ އެންމެ ބޮޑު ކަންބޮޑުވުމަކީ ޒުވާނުންނަށް އެއިން ލިބޭ ޑޮލަރެވެ. ސަރުކާރަށް ބަރޯސާ ނުވެ، ޓްރޭޑިންގ އިން ދިރިއުޅެވޭ ގޮތް ވުމެވެ. މުއިއްޒުގެ އިރުޝާދުގެ ދަށުން ބީއެމްއެލް އިން މިހާރުވަނީ މިފަދައިން ހޯދާ ފައިސާ ފޮނުވާ އެކި ވޮލެޓްތަކުން ރާއްޖެއިން ފައިސާ ނުނެގޭ ގޮތް ހަދާފައެވެ.
އަދި ޑޭ-ޓްރޭޑިންގ އިން ހޯދާ ފައިސާ އެކައުންޓަށް ޖަމާ ކުރުމުން އެއީ އޮންލައިން ކޮށް ޖުވާކޮށްގެން ލިބުނު ފައިސާކަމަށް ބަލައި އެޑޮލަރު ބޭންކުން ހިފެހެއްޓުން ފަދަ ކަންކަން މި ބިލުން މުއިއްޒަށް ބާރު ލިބިގެން ދެއެވެ.
ރިސޯޓުތަކަށް ލިބޭ އާމްދަނީގެ ބޮޑު ބައެއް ޑޮލަރުގެ ގޮތުގައި ސަރުކާރުން ނަގާތީ މިވަގުތު ހުރިހާ ޑޮލަރެއް ހުރީ ރައީސް މުއިއްޒު އަތުގައޭ ބުނެވިދާނެއެވެ. ނަމަވެސް އާންމު މީހާއަށް ލިބޭ ޑޮލަރު ރޭޓު 20:25 އަށް ވަނީ އަރާފައެވެ. ޑޮލަރުގެ ވަގު ވިޔަފާރި އެންމެ ބޮޑަށް ކުރާ އެއްތަނަކީވެސް ދިމްޔާތެވެ. ޚުދު ފަސްޓްލޭޑީ ބޮޑު އަގުގައި ޑޮލަރު ބާޒާރުގައި އެމްއެންޑީއެފްގެ އޮފްޝަލުން ލައްވައި ވިއްކަން ޖަހާފައިވާ ވައިޕަރ ޕޯސްޓްތައް ވަނީ ސޯޝަލް މީޑިޔާގައި އާންމު ވެފައެވެ. އެހެން ކަމުން ނިކަމެތި ރައްޔިތުން އިތުރަށް ނިކަމެތި ކުރުމަށް ޑޭ-ޓްރޭޑިންގ ހުއްޓުވުމަށް ނަންރީތިކޮށް މީހަކަށް ދެކޮޅު ނެހެދޭ ކަހަލަ “ޖުވާ’ ފަދަ ނަމެއް ލާފައި މި މަނާ ކުރީ ޒުވާނުން ފައިސާ ހޯދާ ޓްރޭޑިންގ ސިނާއަތެވެ.
